Ein feste Burg ist unser Gott eftir Johann Crüger. 

Í mörg ár hafa fermingarbörn á Íslandi lagt sitt af mörkum til að safna fyrir vatnsverkefni Hjálparstarfs kirkjunnar í Afríku með frábærum árangri. Í ár er engin undantekning á því og krakkar í fermingarfræðslu í Egilsstaðaprestakalli ætla að ganga í hús fimmtudaginn 3. nóvember og bjóða fólki að styðja verkefnið.

Á heimasíðu Hjálparstarfs kirkjunnar segir:

„Börn í fermingarfræðslu þjóðkirkjunnar ganga í hús um land allt dagana 31. október – 3. nóvember með bauk frá Hjálparstarfi kirkjunnar sem er merktur, númeraður og lokaður með innsigi. Börnin gefa þannig af tíma sínum til að safna fé til verkefna Hjálparstarfsins í Afríku. Kærar þakkir fyrir að taka vel á móti börnunum!

Meðal þess sem börn í fermingarfræðslu þjóðkirkjunnar fá að kynnast í vetur er þróunarsamvinna og hjálparstarf á vegum Hjálparstarfs kirkjunnar. Fermingarbörnin fá að kynnast aðstæðum sem fólkið á verkefnasvæðum býr við og rætt er um sameiginlega ábyrgð á því að allir jarðarbúar fái lifað mannsæmandi lífi.

Í kjölfar fræðslunnar ganga fermingarbörnin í hús og safna framlögum til verkefna sem kynnt hafa verið. Fyrir söfnunina fá börnin leiðbeiningar um framkomu, öryggi og að gleyma ekki að vera vel klædd. Börnunum er uppálagt að fara alltaf  tvö og tvö saman og foreldrar eru hvattir til að ganga með þeim. Börnin fá endurskinsmerki merkt Hjálparstarfi kirkjunnar til að bera á meðan fjáröflun stendur.

„Með verkefninu gefist tækifæri til að fræða fermingarbörnin um gildi náungakærleiks á áþreifanlegan hátt. Með því skapast einnig mótvægi við síbylju neikvæðra frétta og tækifæri til að skynja að öll getum við lagt eitthvað af mörkum,“ sagði Bjarni Gíslason, framkvæmdastjóri kirkjunnar, við undirbúning söfnunarinnar.

Börn í fermingarfræðslu hafa í meira en tuttugu ár lagt sitt af mörkum til Hjálparstarfs með því að ganga í hús með bauk Hjálparstarfs kirkjunnar. Framlag fermingarbarna er afar mikilvægt en árið 2021 söfnuðu þau rúmum 8 milljónum króna með þessum hætti.

Styðja má fjáröflun fermingarbarna til verkefna Hjálparstarfs kirkjunnar í Afríku með því að hringja í söfnunarsíma 907 2003 og gefa 2.500 krónur, leggja upphæð að eigin vali inn á reikning 0334-26-56200, kennitala 450670-0499 eða greiða með greiðslukorti hér.„

Í Fellabæ og á Egilsstöðum ganga krakkarnir í hús 3. nóvember, með innsiglaða söfnunarbauka, og bjóða upp á stuðning við þetta verkefni sem hefur sýnt frábæran árangur og gefur svo mörgum von. Tökum vel á móti fermingarbörnunum sem láta gott af sér leiða!

Það er dásamleg hefð í Egilsstaðakirkju að bjóða til Gospelmessu. Gospel þýðir góðar fréttir fagnaðarerindisins og því liggur áherslan í Gospelmessunni á kröftuga lofgjörð og mikinn söng.

Það er Tryggvi Hermannsson sem leiðir tónlist og sönghóp í Gospelmessunni, eins og oft áður. Öll eru velkomin að taka þátt í þessum gleðilega viðburði. Þau sem vilja vera með í sönghóp er velkomið að hafa samband!

Hér verða allir í stuði með Guði!

Hér er Facebook síða á viðburðinn: https://www.facebook.com/events/440724264853661

Það er komin ný sálmabók! Af því tilefni verður boðið til Sálmaveislu í Egilsstaðakirkju um sálma og helgihald kirkjunnar LAUGARDAGINN 5. NÓVEMBER. Fróðleiksmolar og samtal um helgihald og sálma og MIKILL SÖNGUR.

Sálmaveislan er sérstaklega hugsuð fyrir kórfélaga og söngfólk, sóknarnefndir, organista og presta á svæðinu og hvaðan sem er af landinu! Og öll önnur sem unna söng og samveru eru velkomin.

Sálmaveislan er gott tækifæri til að hittast og eiga gott samfélag, kynnast nýju sálmabókinni, rifja upp kynni við eldri sálma og upplifa nýjar leiðir í því hvernig sálmar og helgihald haldast í hendur. 

Í grófum dráttum er fyrri partur dagsins er helgaður sálmum og messuliðum (hvaða sálmar ganga t.d. sem miskunnarbæn, dýrðarsöngur, heilagur og Guðs lamb?) og seinni partur dagsins helgaður aðventu- og jólasálmum. Við byrjum daginn á sjóðheitu kaffi og nýbökuðum kleinum og súpan í hádegi er þekkt um allan fjórðunginn fyrir bragðgæði og frumlegheit.

Dagurinn okkar verður svona:

10.00 Fólk mætir á staðinn. Kaffi og kleinur í boði í kirkjuvængnum

10.15 Morgunbæn og sálmar í umsjón prófasts Austurlandsprófastsdæmis, sr. Sigríðar Rún Tryggvadóttur

10.30 Söngmálastjóri kirkjunnar, Margrét Bóasdóttir, segir frá nýrri sálmabók og leiðir valda sálma með organistum og kórum

11.15 Þorgeir Arason fjallar um tengsl sálma og helgihalds, brotið upp með söng

11.50 Jóni Ólafi Sigurðssyni þakkað dýrmætt og óeigingjarnt starf í þágu kóra- og sálmastarfs á Austurlandi

12.00 Matarhlé og kaffisopi (safnaðarheimili Hörgsás 4 og kirkjuvængur)

12.50 Jón Ólafur Sigurðsson segir frá starfi sínu í sálmabókarnefnd

13.10 Margrét Bóasdóttir leiðir kynningu og söng á aðventu- og jólasálmum í nýju sálmabókinni. Kórar og organistar slást í hópinn

14.30 Fyrirspurnir og samtal um nýja sálmabók og þýðingu sálma í trúarlífinu

14.50 Veislulok

Til að auðvelda undirbúning er fólk beðið að láta vita um væntanlega þátttöku á netfangið: sigridur.run.tryggvadottir@kirkjan.is

Facebook viðburður er hér: https://www.facebook.com/events/1192380997984067

Egilsstaðakirkja: Sunnudagaskóli kl. 10:30. 

Sr. Þorgeir, Sándor og leiðtogarnir taka vel á móti börnum á öllum aldri, Mýsla og Rebbi láta sig ekki vanta!

Seyðisfjarðarkirkja: Kvöldmessa kl. 20:00 – Allra heilagra messa. Látinna minnst.

Prestur Sigríður Rún Tryggvadóttir. Organisti Rusa Petriashvili. Kór Seyðisfjarðarkirkju.

Vallaneskirkja: Ljósastund kl. 20:00. Allra heilagra messa – Minningardagur látinna

Þegar Dagar myrkurs á Austurlandi eru að ganga í garð komum við saman í nafni ljóss heimsins til guðsþjónustu í Vallanesi undir yfirskriftinni „Ljósastund“ þar sem við tendrum bænaljós í minningu og þökk fyrir látna ástvini.

Stefán Bogi Sveinsson les eigin ljóð um það að missa, sakna og minnast. Prestur er Þorgeir Arason. Organisti Sándor Kerekes. Kór Vallaness og Þingmúla syngur. Kvöldsopi í kirkjunni eftir stundina.

Barnastarfið (Stjörnustund) og fermingarfræðslan verða í vetrarfríi líkt og skólarnir mánudaginn 24. október og þriðjudaginn 25. október. Þetta gildir bæði um starfið í Safnaðarheimili Egilsstaðakirkju og í Kirkjuselinu Fellabæ.

Tilvalið að mæta í einhverju bleiku eða með Bleiku slaufuna! Messan er við lok hvíldarhelgi á Borgarfirði fyrir krabbameinsgreinda og aðstandendur – komum og sýnum samstöðu!

Tilvalið að mæta í einhverju bleiku eða með Bleiku slaufuna!

Frjáls framlög til Krabbameinsfélagsins eftir messu.

Laugardaginn 15. október verður frú Lilja Hallgrímsdóttir kvödd frá Valþjófsstaðarkirkju. Útförin hefst kl. 14 og öll eru velkomin. Hægt verður að fylgjast með streymi frá athöfninni með þessari tengingu: https://www.youtube.com/channel/UCR3J707yV8CflZnqsH1A0Mw/live

Við ætlum að hittast í Seyðisfjarðarkirkju á sunnudagskvöldið kl. 18, á degi heilbrigðisþjónustunnar. Þar verður hún Sigurveig Gísladóttir, fagstjóri hjúkrunar, sem flytur okkur erindi. Við fáum líka að syngja með kór Seyðisfjarðarkirkju undir stjórn Rusa Petriashvili, og það verður sr. Kristín Þórunn Tómasdóttir sem þjónar fyrir altari. Meðhjálpari er Jóhann Grétar Einarsson.

Eftir messu verður boðið upp á kjötsúpu og brauðbita í safnaðarheimilinu. Eins og konan sagði: Þetta verður bæði fræðandi og nærandi. Öll velkomin!