Sunnudaginn 15. nóvember kl. 11 verður messa í Seyðisfjarðarkirkju. Kór kirkjunnar leiðir almennan safnaðarsöng. Kórstjóri og organisti er Sigurbjörg Kristínardóttir.
Prestur er sr. Sigríður Rún Tryggvadóttir og meðhjálpari Jóhann Grétar Einarsson.

Sunnudagaskóli í safnaðarheimili á sama tíma. Umsjón hefur Arna Magnúsdóttir ásamt góðum leiðtogum. Gæðastund fjölskyldunnar með Biblíusögu, kirkjubrúðum og miklum söng.

Kaffi í safnaðarheimili eftir stundina.

Jesús settist gegnt fjárhirslunni og horfði á fólkið leggja peninga í hana. Margir auðmenn lögðu þar mikið. Þá kom ekkja ein fátæk og lét þar tvo smápeninga, eins eyris virði. Og Jesús kallaði til sín lærisveina sína og sagði við þá: „Sannlega segi ég ykkur, þessi fátæka ekkja gaf meira en allir hinir er lögðu í fjárhirsluna. Allir gáfu þeir af allsnægtum sínum en hún gaf af skorti sínum allt sem hún átti, alla björg sína.“ (Mrk 12.41-44).

Guðsþjónusta í Áskirkju 8. nóvember kl. 14.
Sr. Ólöf Margrét Snorradóttir prédikar, kór Áskirkju syngur og leiðir almennan safnaðarsöng. Organisti Drífa Sigurðardóttir. Fermingarbörn aðstoða. Meðhjálpari Bergsteinn Brynjólfsson.

Verið velkomin í kirkjuna undir Ási.

Væntanleg fermingarbörn á Héraði og Seyðisfirði ganga í hús og safna fé til vatnsverkefna Hjálparstarfs kirkjunnar.

3. nóvember milli kl. 17 og 19 ganga börn í Fellabæ í hús.

4. nóvember milli kl. 18 og 20 ganga börn í hús á Egilsstöðum og Seyðisfirði.

Áður en börnin ganga í hús fá þau fræðslu um það hvernig vatnsþró, vatnstankur eða brunnur með hreinu vatni getur gjörbreytt lífi fólks til hins betra: Heilsufar batnar; stúlkur sem áður sóttu vatn um langan veg fá tíma til að sækja skóla; með áveitu verður til meiri og betra fæða og svo koll af kolli.

Með því að taka þátt í fjáröflunarverkefninu fá börnin innsýn í líf jafnaldra sinna í starfssvæðum Hjálparstarfs kirkjunnar í Afríku og kynnast erfiðleikum sem þau búa við. Fermingarbörnin fá líka tækifæri til að ræða um ábyrgð okkar allra á því allir jarðarbúar fái lifað mannsæmandi lífi.

Í nóvember 2014 söfnuðu fermingarbörn á landinu öllu 8.162.460 krónum til vatnsverkefna Hjálparstarfsins í Eþíópíu og Úganda. Söfnunin í ár er sú sautjánda í röðinni en framlag fermingarbarna og stuðningur þeirra er ómetanlegur og kann Hjálparstarfið þeim bestu þakkir fyrir!

Með von um að þú, lesandi góður, takir vel á móti fermingarbörnunum sem banka upp á hjá þér með söfnunarbauk Hjálparstarfs kirkjunnar í hönd. Ef þú ert ekki heima, skilja þau eftir miða með greiðsluupplýsingum um bankareikninn sem hægt er leggja inn á: 0334 – 26 – 56200, kt. 450670-0499. Bestu þakkir!

Happdrætti ÆSKA 2015

Æskulýðssamband kirkjunnar á Austurlandi (ÆSKA) stóð fyrir happdrætti til styrktar ferð unglinga af svæðinu á landsmót ÆSKÞ í Vestmannaeyjum í október sl. Að auki rann hluti af ágóðanum í geðverndarverkefni Hjálparstarfs kirkjunnar.

Á annað hundrað unglinga af Austurlandi tók þátt í landsmótinu, þar fór fram fræðsla og skemmtun til uppbyggingar æskunni. Fulltrúi sýslumannsins á Austurlandi dró í happdrættinu þann 2. nóvember, að viðstöddum votti og fulltrúa ÆSKA.

ÆSKA óskar vinningshöfum til hamingju og þakkar veittan stuðning. Enn fremur þakkar ÆSKA öllum sem gáfu vinninga eða studdu happdrættið á annan hátt kærlega fyrir stuðninginn.

Vinninga má vitja í safnaðarheimili Egilsstaðakirkju, Hörgsási 4. Allar frekari upplýsingar veitir Ólöf Margrét Snorradóttir, s. 662 3198. Vinsamlegast vitjið vinninga fyrir 10. janúar 2016.

Vinningsnúmer:

Sunnudagaskólinn á sínum stað 1. nóvember kl. 10:30 í Egilsstaðakirkju. Söngur, brúður, saga, litamynd og nýr límmiði.

Sunnudagskvöldið 1. nóvember kl. 20:00: Gospelmessa í Egilsstaðakirkju – Ljósamessa.

Í tilefni af Dögum myrkurs lýsum við kirkjuna upp með lifandi ljósum og íhugum „ljósið í myrkrinu.“

Liljurnar syngja og leiða sönginn, kórstjóri Margrét Lára Þórarinsdóttir og undirleikari Tryggvi Hermannsson.

Prestur er Þorgeir Arason.

Kaffisopi eftir messu. Allir velkomnir!

,,Ég er í sjöunda himni því sunnudagur er í dag…“ Við syngjum mikið í sunnudagaskólanum.

Sunnudagaskólinn er á sínum stað í Egilsstaðakirkju kl. 10.30. Það er alltaf fjör í sunnudagaskólanum eins og sjá má á meðfylgjandi myndum frá sunnudagaskólanum 18. október.

Rebbi og Mýsla eru vinsælir gestir í sunnudagaskólanum.

Söngur, sögur og bænir að vanda, Rebbi og Mýsla koma í heimsókn og við heyrum líka söguna af Lasarusi. Öll börn fá límmiða.

Djús og ávextir í boði eftir stundina, og kaffi handa pabba og mömmu.
Láttu sjá þig!

Á Seyðisfirði er sunnudagaskóli kl. 11. Biblíusaga, söngur og bænir.

Allir velkomnir í sunnudagaskólagleðina.

Sunnudagaskóli í Egilsstaðakirkju kl. 10:30. Mýsla og Rebbi á sínum stað, nýr límmiði, fjörugur söngur og djús og dund eftir stund. Barn verður borið til skírnar í stundinni.

Hádegismessa í Egilsstaðakirkju kl. 12:00. Prestur Þorgeir Arason, organisti Torvald Gjerde, kór Egilsstaðakirkju og félagar úr messuhópi taka þátt. Molasopi eftir messuna.

Messa í Seyðisfjarðarkirkju kl. 11:00. Kór Seyðisfjarðarkirkju leiðir söng og organisti er Sigurður Jónsson. Sr. Sigríður Rún Tryggvadóttir þjónar og meðhjálpari er Jóhann Grétar Einarsson.

Sunnudagaskóli á sama tíma í safnaðarheimili Seyðisfjarðarkirkju. Umsjón hefur Arna Magnúsdóttir ásamt góðum leiðtogum. Kaffi og kökur í safnaðarheimili eftir stundina.

Allir velkomnir til kirkju.

Möguleikhúsið sýnir leiksýninguna Eldklerkinn í Fjarðarborg á Borgarfirði þriðjudaginn 13. október kl. 20:00.

Eldklerkurinn Jón Steingrímsson er kunnastur fyrir eldmessuna er hann flutti í miðjum Skaftáreldum, en hver var hann, hvaðan kom hann og hver urðu örlög hans? Hér er sögð saga frá 18. öld af góðum bónda, lækni og presti sem þarf að takast á við afleiðingar skelfilegustu náttúruhamfara Íslandssögunnar á tímum örbirgðar og undirokunar.

“Árið 1783 þann 8. júní, sem var hvítasunnuhátíð, í heiðríku og spöku veðri um dagmálabil, kom upp fyrir norðan næstu byggðafjöll á Síðunni svart sandmistur og mokkur svo stór, að hann á stuttum tíma breiddi sig yfir alla Síðuna”. 

Þannig segir séra Jón Steingrímsson frá upphafi Skaftárelda í eldriti sínu. Jón var prófastur Vestur-Skaftfellinga á árunum 1778-1791 og sjónarvottur að eldsumbrotunum og áhrifum þeirra. Frá honum eru komnar nákvæmustu lýsingarnar af Skaftáreldum sem varðveittar eru, auk þess sem sjálfsævisaga hans er einstakt rit innan íslenskrar bókmenntasögu og gefur góða sýn inn í daglegt líf og hugmyndaheim fólks á 18. öld. Skarpskyggni Jóns endurspeglast víða í ritum hans og eru lýsingar á Skaftáreldum glöggt dæmi um það.

Leikverkið byggir að mestu á skrifum Jóns, en um leið vekur það spurningar um hliðstæður við hamfarir af völdum manna og náttúru sem yfir þjóðina hafa dunið á síðustu árum.

Höfundur handrits og leikari er Pétur Eggerz, leikstjóri Sigrún Valbergsdóttir, leikmynd gerði Rósa Sigrún Jónsdóttir, búninga Thelma Björnsdóttir og hljóðmynd er eftir Guðna Franzson.

Miðaverð er kr. 3.500 og miðasala verður við innganginn.

Eldri borgarar, öryrkjar og nemendur fá 20% afslátt og kostar miðinn þá kr. 2.800.

Úr gagnrýni um sýninguna:

„Pétur og Sigrún hafa unnið þetta verk af alúð“ Silja Aðalsteinsdóttir

„Þessi handritsgerð öll er afburða vel heppnuð og Pétur er sjálfur góður sögumaður sem heldur okkur föstum í tvo klukkutíma (…) Afar vel heppnuð tilraun til að endursegja eitt af höfuðritum bókmenntanna og veita innsýn inn í eitt dramatískasta tímabil Íslandssögunnar.“ Jón Viðar Jónsson

„Því verður hiklaust haldið fram að Eldklerkurinn sé með bestu einleikjum, sem sést hafa á sviði hér á landi að undanförnu.“ Arnþór Helgason