Egilsstaðaprestakall

Viltu sitja í rólegheitum og syngja bestu jólasálmana? Velkomin í Áskirkju mánudagskvöldið 12. des kl. 20 þar sem Drífa Sig og kórinn góði leiða okkur í söng og gleði. 

Þeir sálmar sem verða sungnir eru (allir að æfa sig): 

Hátíð fer að höndum ein.
Kom, þú kom, vor Immanúel.
Ó Jesúbarn.
Guðs kristni í heimi, 1,3,4 og 5 erindi.
Englakór frá himnahöll.
Nóttin var sú ágæt ein. 1,2,3 og 4 erindi.
Það aldin út er sprungið.
Bjart er yfir Betlehem.
Í Betlehem er barn oss fætt.
Ó hve dýrðleg er á sjá. 1,2,3 og 7 erindi.
Jesús þú ert vort jólaljós.
Sjá himins opnast hlið. 1, 4 og 6 erindi.
Í dag er glatt í döprum hjörtum. 1,2 og 5 erindi.
Heims um ból.

Sunnudagaskólinn á Egilsstöðum verður í miklu jólaskapi á þriðja sunnudegi í aðventu, 11. desember kl. 10:30. Við ætlum að hittast í Safnaðarheimili Egilsstaðakirkju að þessu sinni. Þar kveikjum við á aðventukransinum, Rebbi og Mýsla læra um jólin og fæðingu Jesú, við sjáum jólamyndband um vinina Hafdísi og Klemma og auðvitað syngjum við heilmikið af jólalögum. Svo verður boðið upp á heitt súkkulaði, piparkökur og mandarínur. Og við erum velkomin, smá og stór!

Þetta verður síðasta samvera sunnudagaskólans á árinu en minnt er á Jólastund barnanna kl. 14:00 á aðfangadag í kirkjunni.

Sunnudaginn 4. desember, annan sunnudag í aðventu, verður nóg að gerast í Egilsstaðakirkju:

Sunnudagaskólinn kl. 10:30 og nú eru Mýsla, Rebbi og leiðtogar sunnudagaskólans öll komin í jólaskap!

Aðventuhátíð Egilsstaðakirkju kl. 18:00. Barnakór Egilsstaðakirkju og Kór Egilsstaðakirkju syngja undir stjórn Sándors Kerekes organista og Hlínar P. Behrens, sem stjórnar barnakórnum með Sándori. Strengjasveitir nemenda úr Tónlistarskólanum á Egilsstöðum koma fram undir stjórn Mairi L. McCabe. Jóhanna Harðardóttir leikskólakennari flytur aðventuhugleiðingu. Fermingarbörn flytja kertaljósaþátt og að sjálfsögðu syngjum við öll saman, tendrum ljós og komumst í hátíðarskap! (Myndin er frá jólum 2021 enda er jólasnjórinn ekki enn kominn til Egilsstaða þetta árið!)

Aðventukvöld Kirkjubæjar- og Sleðbrjótssókna

verður á Kirkjubæ 1. desember kl. 19:30 (ath. tímann)

Fjölbreytt dagskrá: Kirkjukór sóknanna syngur aðventu- og jólalög, Kristján Ketill Stefánsson syngur einsöng, Skúli Björn Gunnarsson flytur aðventuhugvekju o.fl. Organisti Jón Ólafur Sigurðsson. Prestur Þorgeir Arason.

Kvenfélag Hróarstungu býður í aðventukaffi í Tungubúð eftir stundina í kirkjunni.

Verum velkomin!

Við hefjum jólaundirbúninginn á hátíðlegri stund í Valþjófsstaðarkirkju, á sunnudagskvöldið kemur, 4. desember kl. 20. Þar fáum við að upplifa aðventuna á ljúfum nótum í tali og tónum.

Kór kirkjunnar syngur aðventu- og jólasálma undir stjórn Jón Ólafs Sigurðarsonar, og Hlín Pétursdóttir Behrens syngur einsöng. Þá fáum við að syngja í sameiningu aðventu- og jólasálma sem koma okkur í aðventuskap.

Við hlýðum svo á aðventuorð frá Urði Gunnarsdóttur, verkefnastjóra hjá Austurbrú, sem hefur af mörgu að miðla.

Eftir stundina verður boðið upp á létta hressingu og við höldum endurnærð út í aðventuna og undirbúning jólanna. Verið innilega velkomin.

Aðventuhátíð Vallanes- og Þingmúlasókna verður laugardaginn 3. desember kl. 15 í Vallaneskirkju. Þar fögnum við aðventunni og undirbúningi jólanna með hátíðlegum söng og uppbyggilegu tali.

Kór Vallanes- og Þingmúlakirkju syngur undir stjórn Sándor Kerekes. Einnig verður almennur söngur og við rifjum upp klassíska aðventu- og jólasálma sem koma öllum í aðventuskap.

Sigrún Blöndal kennari flytur okkur svo aðventuorð í hugleiðingarformi og við förum vel nestuð út í aðventuna.

Innilega velkomin!

Hátíðlegt aðventukvöld verður í Kirkjuselinu í Fellabæ, miðvikudaginn 30. nóvember kl 20. Við hlýðum á fagra tónlist undir stjórn Drífu Sigurðardóttur og kórs Áskirkju, börn úr barnastarfi kirkjunnar syngja aðventusálma og Einar Guttormsson frá Krossi flytur ávarp. Á eftir hressum við okkur á góðgæti við allra hæfi.

Tökum tímann frá og njótum kyrrðar og gæða aðventunnar í tengslum við hvert annað!

Það er gott að marka uppaf aðventunnar og jólaundirbúnings með því að koma til kirkju og eiga saman nærandi og skemmtilega stund. Á fyrsta sunnudegi í aðventu syngjum við fallega sálma og tendrum fyrsta ljósið á aðventukransinum. Barnakórinn leiðir nokkra söngva undir stjórn Sándors Kerekes sem þjónar ásamt sr. Kristínu.

Þá fáum við góðan gest en það er Ágústa Ósk Jónsdóttir, sem ætlar að bregða sér í sögustólinn og svara nokkrum spurningum hvernig aðventan var í gamla daga!

Verum innilega velkomin í Egilsstaðakirkju í byrjun aðventu!