Egilsstaðaprestakall

Stuðningshópur fyrir fólk sem hefur misst ástvin fer næst af stað þriðjudaginn 18. október kl. 17:30-19:00 í Kirkjuselinu í Fellabæ. Hópurinn mun hittast sex þriðjudaga í röð (fram að aðventu). Umsjón hefur sr. Sigríður Rún Tryggvadóttir.

Slíkir hópar, sem helgaðir eru samtali um missi og sorg, eru að jafnaði í boði einu sinni til tvisvar á ári hér í Egilsstaðaprestakalli. Markmiðið með stuðningshópnum er að fólk sem hefur misst ástvin geti leitað stuðnings og deilt með öðrum sameiginlegri reynslu. Í sorgarhópum á sér ekki stað formleg meðferð, heldur samtal. Í sorgarhópum er ekki leitast við að ýta sorginni í burtu eða að þrýsta á viðkomandi að „lífið haldi áfram“ eins og stundum er sagt. Samfélag með öðrum sem hafa misst getur verið hjálplegt til að bera sorgina og horfast í augu við breyttan hversdag. Fjöldi í hóp er takmarkaður til að öll sem vilja hafi tækifæri til að tjá sig. Þátttaka er að kostnaðarlausu og engin skilyrði eru um trúfélagsaðild eða annan bakgrunn, en athugið að starf hópsins fer fram á íslensku.

Skráning og nánari upplýsingar á egilsstadakirkja@gmail.com og hjá prestunum.

Þar sem rauð veðurviðvörun tekur senn gildi fyrir Austurland að Glettingi og íbúum ráðlagt að halda sig heima, er bleiku messunni sem vera átti í Egilsstaðakirkju í kvöld frestað. Bleika messan er nú áætluð 23. október kl. 20:00.

Sr. Jóhanna Ingibjörg Sigmarsdóttir, fv. sóknarprestur Egilsstaðaprestakalls og prófastur, sem lést á Akureyri þann 26. september síðast liðinn, verður jarðsungin frá Egilsstaðakirkju í dag, laugardaginn 8. október.

Sr. Kristján Valur Ingólfsson, fv. vígslubiskup í Skálholti, jarðsyngur. Kór Egilsstaðakirkju syngur undir stjórn Sándors Kerekes organista. Hlín Pétursdóttir Behrens syngur einsöng. Jarðsett verður í Egilsstaðakirkjugarði.

Streymi á útförina er að finna hér og hefst um kl. 12:30.

Seyðisfjarðarkirkja:

Sunnudagaskóli kl 11. Umsjón hefur Gunnfríður Katrín Tómasdóttir ásamt aðstoðarleiðtogum. Litablöð og djús í safnaðarheimili eftir skóla. 

Egilsstaðakirkja:

Sunnudagaskóli kl. 10:30. Þorgeir, Sándor, Elísa og Guðný taka vel á móti börnum á öllum aldri. Litablöð og hressing í lokin.

Bleik messa kl. 20:00

Kvöldmessa í léttum dúr með alvarlegum undirtóni þar sem stundin er tileinkuð árvekniátaki Krabbameinsfélagsins, Bleikum október.

Haraldur Geir Eðvaldsson flytur reynslusögu sem aðstandandi.

Prestur Þorgeir Arason. Sándor Kerekes organisti og Kór Egilsstaðakirkju leiða tónlistina. Kaffisopi eftir messu.

Áður auglýstri guðsþjónustu sem vera átti í Valþjófsstaðarkirkju þann 2. október nk. er frestað um óákveðinn tíma, vegna frestunar Leikmannastefnu þjóðkirkjunnar.

Sunnudagaskólinn í Egilsstaðakirkju er á sínum stað 2. október kl. 10:30.

Sunnudagaskólinn í Egilsstaðakirkju fellur niður á morgun 25.9. vegna veðurs. Nú er best að festa lausamunina, hita svo bara kakó á morgun og vera inni að horfa á Daginn í dag Sjáumst hress eftir viku!

TTT byrjar í dag klukkan 1700 í safnaðarheimili Egilsstaðakirkju, Hörgsási 4. Þar verður mikil gleði og gaman! Hlakka til að sjá ykkur!

Leikmannastefnan 2022 verður haldin á Austurlandi og það er sóknarnefnd Egilsstaðakirkju sem hefur veg og vanda að undirbúningi hennar. Föstudaginn 30. september koma saman fulltrúar frá öllu landinu og eiga heila helgi saman þar sem málefni kirkju og kristni verða rædd, auk þess sem lista og skemmtunar frá Austurlandi verður notið í góðum félagsskap.

Leikmannastefna verður sett með guðsþjónustu í Egilsstaðakirkju og verður slitið með helgistund í Valþjófsstaðarkirkju. Ráðstefnan sjálf er haldin á Hallormsstað í dásamlegri náttúru Fljótsdalshéraðs.

Í gær fór undirbúningshópur frá Egilsstaðakirkju í vettvangsferð í Hallormsstað og er myndin tekin við það tilefni fyrir framan tjaldið góða sem Heiðrún hótelstýra sýndi.

Á þriðjudögum eru krökkum í 1.-4. bekk boðið í frístundastarf í Kirkjuselinu Fellabæ kl. 15-16. Kristín Þórunn og Kristófer taka vel á móti öllum 6-9 ára! Starfið byrjar 13. september og heldur áfram í allan vetur.

Í dag 12. september klukkan 16:00 hefst Stjörnustund, starf fyrir krakka á aldrinum 6-9 ára, í safnaðarheimili Egilsstaðakirkju, Hörgsási 4. Öll börn velkomin!

Ábyrgðarmaður: Gunnfríður Katrín Tómasdóttir, starfandi fræðslufulltrúi.