Í janúarmánuði fór fram gagnger hreinsun, viðgerð og stilling á pípuorgeli Egilsstaðakirkju. Verkið unnu þau Björgvin Tómasson orgelsmiður og kona hans, Margrét Erlingsdóttir rafvirki. Endurbótunum verður fagnað með orgel- og söngkvöldi í kirkjunni í kvöld, 5. mars kl. 20:00.

Orgelið kom í Egilsstaðakirkju haustið 1978, fjórum árum eftir vígslu kirkjunnar. Um er að ræða prýðilegt 19 radda hljóðfæri með tveimur hljómborðum og fótspili, smíðað af Mascioni-verksmiðjunni á Ítalíu. Mælt er með að orgel séu hreinsuð á 10-15 ára fresti til að viðhalda hljómgæðum sínum, en aldrei áður hafði farið fram gagnger hreinsun á þessu orgeli, svo það var orðið afar aðkallandi.

Aðdragandinn að verkinu sem nú var unnið er orðinn nokkuð langur. Verk af þessu tagi er kostnaðarsamt fyrir lítinn söfnuð enda þörf á mikilli og sérhæfðri vinnu. Þar sem Egilsstaðasókn býr við bágan fjárhag, líkt og flestallar sóknir landsins þessi misserin, þurfti að leita lausna á málinu. Tónlistarsjóður kirkjunnar var stofnaður á aðalsafnaðarfundi vorið 2018 og sitja þau Björn Ingimarsson bæjarstjóri, Jarþrúður Ólafsdóttir kennsluráðgjafi og kórfélagi og Torvald Gjerde organisti í stjórn sjóðsins. Leitað var til einstaklinga, fyrirtækja og félagasamtaka á svæðinu um að leggja verkefninu lið, auk annarra sókna í prestakallinu, en við Egilsstaðakirkju fara fram ýmsar athafnir og viðburðir sem þjóna stærra svæði en sókninni einni. Kórar og hljómlistarmenn komu einnig fram á tónlistarviðburðum þar sem aðgangseyrir og/eða frjáls framlög runnu til verkefnisins. Ánægjulegt var að finna allan þann velvilja sem kirkjan og menningarlíf hennar nýtur í samfélaginu hér á Fljótsdalshéraði. Stærsti einstaki styrkurinn kom frá Kvenfélaginu Bláklukku á Egilsstöðum, kr. 500.000. Þrjú hótel á svæðinu styrktu verkefnið einnig í formi gistingar og uppihalds í viku í senn fyrir orgelsérfræðingana.

Margt smátt gerir eitt stórt og alls söfnuðust um þrjár og hálf milljón í sjóðinn eða nánast allur kostnaður við verkið. Vilja stjórn sjóðsins og sóknarnefnd Egilsstaðakirkju koma á framfæri innilegu þakklæti sínu til allra þeirra sem lögðu verkefninu lið.

Mikil ánægja er í Egilsstaðakirkju með afraksturinn af vinnu þeirra Björgvins og Margrétar. Hljóðið í orgelinu er nú miklu tærara en áður, vélasuð horfið og ekki spillir að loftið í kirkjunni er hreinna og betra, enda allt að 40 ára gamalt ryk horfið úr hljóðfærinu! Þá ber þess að geta að Hermann Eiríksson trésmiður aðstoðaði Björgvin við hljóðeinangrun á mótor og blásara svo og við lagningu lagna upp í orgelið til að taka inn loft í það ofar en áður. Hermann hefur sungið í Kór Egilsstaðakirkju frá því að kirkjan var vígð og var einmitt meðal lykilmanna í orgelkaupunum á sínum tíma.

Til að fagna „upprisu“ hljóðfærisins bjóða Kór Egilsstaðakirkju og Torvald Gjerde organisti kirkjunnar til orgel- og söngkvölds í kirkjunni í kvöld, fimmtudaginn 5. mars kl. 20:00. Fjölbreytt tónlistardagskrá, samsöngur og kaffiveitingar í lokin. Allir velkomnir og frítt inn en frjáls framlög vel þegin því að enn vantar örlítið upp á að tekist hafi að safna fyrir öllum kostnaði við verkefnið. Bankareikningur: 175-15-020004, kt. 690777-0299.