Sunnudaginn 26. júlí kl. 20:00, verður haldin ljóðamessa í Egilsstaðakirkju. Séra Davíð Þór Jónsson þjónar fyrir altari og prédikar.

Kór og organisti verða í hvíld, en í staðinn verður hið talaða orð, skáldskapurinn, í brennidepli. Messan verður með hefðbundnu sniði að því undanskildu að í stað sálmasöngs lesa austfirsk skáld frumsamin ljóð með andlegu og trúarlegu ívafi. Skáldin sem leggja hönd á plóg í ljóðamessunni eru Arnar Sigbjörnsson, Hulda Sigurdís Þráinsdóttir, Ingunn Snædal, Sigurður Ingólfsson og Stefán Bogi Sveinsson.

Að sjálfsögðu eru allir velkomnir og vonast aðstandendur til að sem flestir láti sjá sig.