Veistu hvað það er gaman í sunnudagaskólanum? Innilega velkomin í safnaðarheimilið okkar alla sunnudaga kl. 10.30 þar sem við syngjum og leikum og heyrum góðu fréttirnar um Jesú. Þennan sunnudag bjóða sr. Kristín, Sándor og leiðtogarnir upp á mikið stuð og stemningu. Á eftir fáum við svo djús, ávexti og fáum að lita flottar myndir. Sjáumst!

Sunnudaginn 26. febrúar kl. 20 höldum við dásamlegt sálmakvöld í KIRKJUSELINU í Fellabæ. Kórar Áskirkju og Egilsstaðakirkju undir stjórn Drífu Sigurðardóttur og Sándor Kerekes leiða okkur í gömlum og nýjum föstusálmum og sr. Kristín segir frá og íhugar.

Innilega öll velkomin til að kynnast og upplifa sálmafjársjóðinn okkar í upphafi föstunnar.

Við fögnum konudeginum í Egilsstaðakirkju með gleðilegri guðsþjónustu kl. 20. Við njótum fagurra tóna Héraðsdætra undir stjórn Drífu Sigurðardóttur við undirleik Sándors Kerekes og sr. Kristín íhugar blessunarboðskap Biblíunnar um fegurð og frelsi sem stendur okkur öllum til boða.

Eftir stundina verður vöfflukaffi í umsjón æskulýðsfélagsins Bíbí sem er í fjáröflun fyrir sitt mikilvæga og skemmtilega starf. Allir að mæta með upprúllaða 500 kalla í vasanum!

Verum innilega velkomin í kirkjuna okkar að kvöldi 19. febrúar.

Svo er SUNNUDAGASKÓLINN að sjálfsögðu á sínum stað kl. 10.30 í safnaðarheimilinu, þar taka sr. Þorgeir, Sándor og umsjónarfólkið vel á móti öllum krökkum og vinum þeirra.

Í dag 13. febrúar verður útför Huldu Halldóru Gunnþórsdóttur gerð frá Seyðisfjarðarkirkju. Fylgjast má með streymi frá útförinni hér

Egilsstaðakirkja, sunnudagurinn 12. febrúar:

Messa kl. 10:30.

Sr. Þorgeir Arason predikar og þjónar fyrir altar. Organisti og kórstjóri er Sándor Kerekes. Kór Egilsstaðakirkju syngur og leiðir almennan söng.

Sunnudagaskólinn í Safnaðarheimilinu á sama tíma.

Sr. Kristín Þórunn, Elísa, Guðný, Ragnheiður og fermingarbörn leiða stundina.

Hjúkrunarheimilið Dyngja, Egilsstöðum:

Guðsþjónusta sama dag, 12. febrúar, kl. 17:00. Prestur sr. Kristín Þórunn Tómasdóttir. Organisti Sándor Kerekes. Barnakór Egilsstaðakirkju syngur.

(Myndina af Egilsstaðakirkju tók Unnar Erlingsson)

Sunnudagaskólinn er á sínum stað þann 29. janúar – eins og alla sunnudaga – kl. 10:30 og nú á vormisserinu hittumst við í Safnaðarheimilinu (gula húsið fyrir neðan kirkjuna). Þar syngjum við mikið, brúðurnar koma í heimsókn, við kveikjum á kertum, heyrum góðan boðskap og eigum góða stund saman. Endum alltaf á að fá okkur smá hressingu og lita mynd. Sr. Þorgeir, Sándor, Elísa, Guðný og Ragnheiður sjá um stundina.

Gospelmessa í Egilsstaðakirkju 29. janúar kl. 20:00. Orðið gospel vísar í gleðiboðskap trúarinnar og létta tónlist þar sem trúargleði og lofgjörð til Drottins er í fyrirrúmi. Að þessu sinni mun sr. Þorgeir Arason predika og leiða stundina. Sándor Kerekes verður tónlistarstjóri, Kór Egilsstaðakirkju og aðrir gospelfuglar syngja og leiða okkur öll í söng. Kaffisopi í lokin. Verum hjartanlega velkomin.

Vekomin í fyrstu Kyrrðarbæn ársins í Kirkjuselinu í Fellabæ, kl. 18 sunnudaginn 22. janúar. Í henni játumst við og tökum á móti nærveru og verkan Guðs innra með okkur. Við gerum það í gegnum lestur ritningarinnar, einfalda sálma og bænir. 

Við megum líta á þessa stund sem áfanga á leið þar sem augu okkar opnast og athygli okkar skerpist á því að skynja nærveru Guðs á öllum tímum og í öllum aðstæðum. 

Verum öll velkomin til að þiggja frið og blessun Guðs í samfélagi við hvert annað í þessari einföldu guðsþjónustu.

Sunnudagaskólinn er á sínum stað, alltaf kl. 10.30, í Hörgsási 4. Núna ætlum við að tala um vináttuna og hvað það er mikilvægt að hjálpast að. Við syngjum mikið og fáum Rebba og Mýslu í heimsókn.

Eftir stundina má staldra við og lita, svo verður boðið upp á kaffi, djús og ávexti.

Öll innilega velkomin!

Það er líflegt í Kirkjuselinu í Fellabæ á miðvikudögum milli 13-15 þegar hressir eldri borgarar hittast yfir kaffi og kruðeríi. Margir taka með sér handavinnu og fellur ekki verk úr hendi, aðrir taka með sér ljóðabækur og blaðaúrklippur og lesa upp, sjálfum sér og öðrum til ánægju.

Stundum grípur sr. Kristín gítarinn og leiðir söng, enda er hópurinn sérlega tónelskur og lagviss. Í dag förum við t.d. að dusta rykið af þorralögunum sem við elskum öll!

Allir eldir borgarar og þau sem skilgreina sig þannig, eru innilega velkomin á Opið hús í Kirkjuselinu í Fellabæ á miðvikudögum kl. 13.