Hátíðarmessa í tilefni 120 ára vígsluafmælis Áskirkju verður haldin sunnudaginn 21. október kl. 14. 

Prestar Egilsstaðaprestakalls þjóna ásamt sr. Láru G. Oddsdóttur, fv. sóknarpresti. Sr. Davíð Baldursson, prófastur Austurlandsprófastsdæmis prédikar.

Kór Áskirkju syngur, organisti Drífa Sigurðardóttir.

Meðhjálpari Bergsteinn Brynjólfsson.

Að messu lokinni er boðið til kirkjukaffis í Kirkjuselinu Fellabæ.

Verið velkomin til messu!

Um Áskirkju:
Ás í Fellum er forn kirkjustaður og fyrrum prestssetur. Líklegt er talið að þarna hafi verið kirkja frá upphafi kristni en í kaþólskri tíð var kirkjan helguð Maríu guðsmóður. Páll biskup Jónsson getur kirkju í Ási í kirknatali sínu frá því um 1200.  Ás hélst í bændaeign til 1662 en þá keypti Brynjólfur biskup Sveinsson jörðina og ánafnaði hana kirkjunni. Prestar sátu jörðina eftir það í rúmlega tvær aldir (1669-1884) uns Ásprestakall var sameinað Valþjófsstaðarprestakalli 22. desember 1883 og síðasti presturinn á Ási, sr. Sigurður Gunnarsson, fluttist í Valþjófsstað vorið 1884. Jörðin Ás hefur verið í eyði frá 1962 en hún komst aftur í bændaeign árið 1910. Söfnuðurinn tók við fjárhaldi og umsjá kirkjunnar árið 1957.

Áskirkja í Fellum var reist úr timbri árið 1898 er sr. Þórarinn Þórarinsson þjónaði sókninni og var Vigfús Kjartansson, frá Sandbrekku, yfirsmiður. Kirkjan var vígð 30. október sama ár. Áður stóð á sama grunni allmyndarleg timburkirkja en eitthvað  minni, frá 1851. Úr þeirri kirkju er altaristaflan sem er litlu eldri en sú kirkja. Hún sýnir Krist á krossinum og er erlend en ekki er vitað hver listamaðurinn var. Predikunarstóllinn og númerataflan eru sömuleiðis úr þessari gömlu kirkju.

Kvenfélagið Dagsbrún gaf kirkjunni vandaðan skírnarfont í tilefni 75 ára afmælis kirkjunnar 1973. Hann er fagurlega útskorinn af Þórarni Stefánssyni frá Mýrum í Skriðdal.

Árið 1976 hófst gagngerð viðgerð á Áskirkju, sem Húsiðjan hf. sá um undir forystu Ástráðs Magnússonar byggingameistara, samkvæmt tillögum Bjarna Ólafssonar lektors, og ýmsu viðhaldi verið sinnt síðar, m.a. var raflögn endurnýjuð 2010. Snorri S. Guðvarðsson hóf að málaði kirkjuna að innan í upprunalegum litum árið 2011.

Í kirkjunni er ítalskt rafmagnssorgel en það leysti af hólmi harmoníum sem keypt var 1892. Fyrsti organistinn mun hafa verið Sigurður Jónsson í Hrafnsgerði.

Eftir að verulega fjölgaði í Fellabæ vildu sumir flytja kirkjuna þangað eða byggja kirkju þar út frá en um 13 km eru inn að Ási. Í stað þess að hefja framkvæmdir við kirkjubyggingu festi sóknin kaup á húsnæði í fjölnotahúsi í Fellabæ þar sem innréttaður var rúmgóður safnaðarsalur, fundaherbergi og skrifstofa ásamt eldhúsi, snyrtingum og geymslu og fékk það nafnið Kirkjusel. Biskup Íslands vígði Kirkjuselið 16. nóvember 2003. Kirkjuselið er nýtt undir helgihald og annað safnaðarstarf auk fundahalds og ráðstefna tengdum kirkjunni. Við Áskirkju var reist þjónustuhús árið 2008 sem bætir alla aðstöðu við kirkjuna, þar er kaffiaðstaða, snyrting, geymsla og skrúðhús. Tréiðjan Einir ehf. hafði veg og vanda af byggingu hússins.

Í sókninni eru þrír kirkjugarðar. Niðurlagður garður er við kirkjuna og annar allfjarri henni. Árið 1984 var vígður nýr kirkjugarður í Ekkjufellsseli við Fellabæ. Heimagrafreitir eru algengir í sókninni eða 15 talsins. Þessi fjöldi grafreita, sem er einsdæmi, mun að nokkru leyti tengjast vandamálum sem við var að etja með kirkjugarð á Ási (sjá ritgerð Heiðveigar Agnesar Helgadóttur 2010: Heimagrafreitir í Fellum).

Mörg örnefni í sveitinni marka gamla kirkjuleið, má þar nefna Kirkjuklauf, Prestalág, Tíðaklettog Prestsás. Við Teigará í landi Holts er Prestsbotn ,,þar stanzaði Valþjófsstaðarprestur oft á ferð sinni meðfram Fljótinu“ (Örnefnaskrá).

Heimildir:
Vigfús Ingvar Ingvarsson, 2011: Kirkjur og kirkjugöngur í Múlaprófastsdæmi
Kirkjur á Austurlandi, Áskirkja: nat.is/Kirkjur/Kirkjur%20austurland%20askirkja.htm

Miðasala hafin!

Happdrætti ÆSKA er fjáröflun æskulýðsfélaga kirkjunnar á Austurlandi fyrir ferð á landsmót ÆSKÞ, sem að þessu sinni er haldið á Egilsstöðum. Með kaupum á miðanum styrkir þú ferðasjóðinn sem einnig greiðir fyrir leiðtogana. Auk þess rennur hluti ágóðans í styrktarsjóð Hjálparstarfs kirkjunnar sem styður börn og unglinga í frístundastarfi.

Á næstu dögum munu unglingar í æskulýðsfélögum á Austurlandi selja happdrættismiða sína. Tökum vel á  móti þeim.

Fjöldi glæsilegra vinninga, aðeins dregið úr seldum miðum.
Miðaverð kr. 1.500.

Dregið verður 5. nóvember, upplýsingar um vinningsnúmer birtast á egilsstadaprestakall.is og í Dagskránni. Vinninga skal vitja fyrir 10. janúar, upplýsingar í síma 869 0637 (Erla Björk).

Við þökkum öllum sem stutt hafa happdrættið með framlagi sínu og gjöfum. Unnari Erlingssyni þökkum við hönnun miðans og Héraðsprent fyrir að prenta miðana.

Egilsstaðakirkja:

Sunnudagaskólinn kl. 10:30

Guðsþjónusta á Hjh. Dyngju kl. 17:00

Messa kl. 18:00 í kirkjunni

Sr. Þorgeir Arason, organisti Torvald Gjerde og Kór Egilsstaðakirkju.

Seyðisfjarðarkirkja:

Sunnudagaskólinn kl. 11:00

 Bláa kirkjan verður bleik í október og kl. 18:00 verður Bleik messa, Létt kvöldmessa með alvarlegum undirtóni. Sigrún Ólafsdóttir, hjúkrunarfræðingur deilir reynslu sinni. Kór Seyðisfjarðarkirkju leiðir almennan safnaðarsöng undir stjórn Sigurbjargar Kristínardóttur, organista.

Kjötsúpa eftir messu

Prestur er Sigríður Rún Tryggvadóttir og meðhjálpari er Jóhann Grétar Einarsson.

Verið velkomin!

Sunnudagurinn 7. október:

Egilsstaðakirkja: Barna- og fjölskyldumessa kl. 10:30

Barnakór kirkjunnar syngur.

Kórstjóri og organisti Torvald Gjerde.

Rebbi refur og sunnudagaskólalögin verða á sínum stað.

Ávaxtakaffi og litamynd eftir stundina.

Þorgeir Arason sóknarprestur og leiðtogar barnastarfsins stýra stundinni.

Allir velkomnir, ungir sem aldnir!

Egilsstaðakirkja býður í vetur upp á sjálfstyrkingarnámskeiðið
Tólf sporin – andlegt ferðalag.
Tólf spora vinna hentar öllum þeim
sem í einlægni vilja vinna með tilfinningar sínar
í þeim tilgangi að öðlast betri líðan og meiri lífsfyllingu þar sem leitað er styrks í kristinni trú.

Opnir kynningarfundir verða í Safnaðarheimili Egilsstaðakirkju, Hörgsási 4, mánudagana 1. og 8. október kl. 20.

Þar gefst færi á að kynna sér í hverju tólf spora vinnan felst.
Á þriðja fundinum þann 15. október verður hópunum lokað og sporavinnan hefst en hún fer fram í litlum hópum sem hittast vikulega.

Unnið er með bókina Tólf sporin – andlegt ferðalag.
Starfið er þátttakendum að kostnaðarlausu.

Vinir í bata er hópur fólks sem hefur tileinkað sér tólf sporin sem lífstíl. Á heimasíðu þeirra má finna frekari upplýsingar um tólf sporin sem og lesa reynslusögu margra sem eru á hinu andlega ferðalagi sem tólf sporin eru.

Verið velkomin til að kynna ykkur hvernig nýta má 12 sporin til að
bæta líf sitt og líðan.

Og þú skalt elska Drottin, Guð þinn, af öllu hjarta þínu, allri sálu þinni, öllum huga þínum og öllum mætti þínum. Annað er þetta: Þú skalt elska náunga þinn eins og sjálfan þig. Ekkert boðorð annað er þessum meira. (Mrk 12.30-31).

Guðsþjónusta með léttu sniði í Kirkjuselinu Fellabæ, 30. september kl. 14.
Sr. Ólöf Margrét Snorradóttir leiðir stundina, félagar úr kór Áskirkju syngja og leiða söng, organisti Drífa Sigurðardóttir.

Verið velkomin!

Sunnudaginn 16. september er fjölskylduguðsþjónusta í Seyðisfjarðarkirkju kl. 11.

Kór Seyðisfjarðarkirkju leiðir safnaðarsöng. Organisti er Sigurbjörg Kristínardóttir

Biblíusaga, kirkjubrúður, söngur og Nebbi. Umsjón með stundinni hefur  sr. Sigríður Rún Tryggvadóttir ásamt aðstoðarleiðtogum.

Kaffi og kökur í safnaðarheimili eftir stundina.

Sunnudagaskóli í Egilsstaðakirkju kl. 10:30 og að þessu sinni eru börnin hvött til að taka með sér bangsa eða dúkku í kirkjuna! Sr. Þorgeir, Guðný, Elísa, Torvald o.fl. sjá um stundina.

Guðsþjónusta kl. 17:00 á Hjúkrunarheimilinu Dyngju, 3. hæð. Sr. Ólöf Margrét Snorradóttir, Kór Egilsstaðakirkju og Torvald Gjerde organisti.

Messa kl. 18:00 í Egilsstaðakirkju – Dagur íslenskrar náttúru. Sr. Ólöf Margrét Snorradóttir, Kór Egilsstaðakirkju og Torvald Gjerde organisti. Meðhjálpari Jónas Þór Jóhannsson.

Verið velkomin!