Til foreldra og forráðamanna barna á Héraði f. 2011!

Barninu þínu er boðið að taka þátt í fermingarundirbúningi þjóðkirkjunnar í Egilsstaðaprestakalli veturinn 2024-2025. Umsjón með starfinu hafa prestarnir Kristín Þórunn, Sigríður Rún og Þorgeir. Hægt verður að sækja fermingarfræðslu í Safnaðarheimili Egilsstaðakirkju eða í Kirkjuselinu í Fellabæ.

Í fermingarfræðslu þjóðkirkjunnar er lögð áhersla á góða samveru, helgihald kirkjunnar og að kynna og upplifa sögur Biblíunnar, boðskap Jesú, kristna siðfræði og gildi trúarinnar í daglega lífinu okkar.

Upphaf fermingarstarfsins verður með guðsþjónustu og kynningarfundi fyrir væntanleg fermingarbörn og forráðamenn (veljið annan hvorn tímann):

• í Egilsstaðakirkju, sunnudaginn 25. ágúst kl. 20:00
• í Kirkjuselinu Fellabæ, sunnudaginn 1. september kl. 18:00

Tímasetning fræðslunnar veturinn 2024-2025 (veljið einn hóp):

a) Safnaðarheimili Egilsstaðakirkju (Hörgsás 4): þriðjudaga kl. 15:45-16:45 (10x/önn – byrjar 3. sept.)

b) Safnaðarheimili Egilsstaðakirkju (Hörgsás 4): miðvikudaga kl. 7:55-8:40 (12x/önn – byrjar 4. sept.)

c) Kirkjuselið Fellabæ (sambyggt íþróttahúsinu): mánudaga kl. 14:30-15:30 (10x/önn – byrjar 2. sept.)

Fermingarnámskeið (fermingarbúðir) í Kirkjumiðstöð Austurlands að Eiðum er mikilvægur og skemmtilegur hluti af fermingarvetrinum þar sem við gistum tvær nætur og tökum þátt í fjölbreyttri og skemmtilegri dagskrá. Mæting sunnudaginn 29. september 2024 kl. 18:00 – dagskrá lýkur þriðjudaginn 1. október kl. 12:00.

Nánari áætlun og upplýsingar um starfið í vetur verða kynntar á fundunum 25. ágúst / 1. september og á vefnum egilsstadakirkja.is / egilsstadaprestakall.is.

Hægt verður að velja um eftirfarandi fermingardaga vorið 2025:

Áskirkja í Fellum: 1. júní (sjómannadagurinn) og 15. júní 2025 kl. 11:00

Egilsstaðakirkja: 17. apríl (skírdagur) og 8. júní (hvítasunnudagur) 2025 kl. 10:30

Aðrar kirkjur: Eftir samkomulagi við prest. Ath! Miðað er við að ein fermingarathöfn sé í boði í hverri af öðrum kirkjum prestakallsins.

Fermingarfræðslugjald: U.þ.b. 25.000 kr., nánar tilkynnt í haust.

Kostnaður við fermingarbúðir á Eiðum: kr. 11.500 fyrir fermingarbörn sem skráð eru í þjóðkirkjuna (fullt verð kr. 15.000, þjóðkirkjusöfnuðirnir niðurgreiða fyrir sitt fólk) – innifalið fæði og gisting í tvær nætur.

Ef þið fjölskyldan viljið taka þátt í fræðslunni og ferma barnið ykkar þarf að skrá það hér. Allar nánari upplýsingar hjá prestunum.

Kærleikskveðjur,

Kristín Þórunn Tómasdóttir s. 862 4164 (kristin.tomasdottir@kirkjan.is)

Sigríður Rún Tryggvadóttir, s. 698 4958 (sigridur.run.tryggvadottir@kirkjan.is)

Þorgeir Arason s. 847 9289 (thorgeir.arason@kirkjan.is)

Þann 16. júní n.k. eru 50 ár frá því að Egilsstaðakirkja var vígð. Af því tilefni verður efnt til ýmissa viðburða, m.a. ljósmyndasýningar í Sláturhúsinu. Við leitum að myndum og minningarbrotum sem tengjast kirkjunni síðustu 50 árin. Kíkið í myndaalbúmin og gáið hvort ekki leynist skemmtilegar myndir frá eftirminnilegum stundum, vígsla kirkjunnar, ferming yngsta barnsins, gifting foreldranna, skírn, sálmaskrár, jólatónleikar…Og svo framvegis. Efni sendist á sigridur.run.tryggvadottir@kirkjan.is fyrir 20. maí.

Sunnudagurinn 28. apríl, fjórði sunnudagur eftir páska:

Sunnudagaskólinn í Safnaðarheimili Egilsstaðakirkju kl. 10:30. Þetta verður síðasti „venjulegi“ sunnudagaskólinn okkar í vetur, því að þann 5. maí lýkur barnastarfi vetrarins með vorhátíð í Kirkjumiðstöðinni við Eiðavatn.

Kvöldmessa í Egilsstaðakirkju kl. 20:00. Sr. Þorgeir Arason predikar og þjónar fyrir altari ásamt Jónasi Þór Jóhannssyni meðhjálpara og lesurum. Organisti Sándor Kerekes. Kór Egilsstaðakirkju syngur. Fögnum sumri í bæn og lofsöng, þökkum Guði alla blessun og leggjum sumarið framundan í Guðs hendur. Verum öll velkomin. (Myndina af kirkjuturninum tók Unnar Erlingsson.)

Héraðsfundur Austurlandsprófastsdæmis fer fram í Kirkjumiðstöðinni við Eiðavatn 28. apríl kl. 10-17. Sjá nánar hér.

Verum innilega velkomin í KIRKJUSELIÐ okkar í Fellabæ, kl. 14, á Sumardaginn fyrsta. Við fögnum sumri og syngjum fallega sumarsálma. Við minnumst einnig þjónustu sr. Jóhönnu Ingibjargar Sigmarsdóttur sem hefði orðið áttræð þennan dag, 25. apríl.

Fjölskylda sr. Jóhönnu býður í kirkjukaffi eftir stundina og fyrir það erum við þakklát.

Takk fyrir veturinn og Guð gefi okkur gleðilegt sumar!

Aðalsafnaðarfundur Ássóknar verður haldinn í KIRKJUSELINU FELLABÆ þriðjudaginn 23. apríl kl. 20. Á dagskrá eru venjuleg aðalfundarstörf skv. 4. gr. starfsreglna um söfnuði og sóknarnefndir.

Fundurinn hefur verið auglýstur eins og lög gera ráð fyrir og á hann eru öll sóknarbörn velkomin.

Helgihald 21. apríl, sem er 3. sunnudagur eftir páska:

Sunnudagaskóli í Safnaðarheimili Egilsstaðakirkju kl. 10:30. Umsjón sr. Þorgeir, Sándor, Guðný og Ragnheiður og auðvitað mætir Rebbi refur á svæðið!

Gospelmessa í Bakkagerðiskirkju (Borgarfirði) kl. 20:00. Stund á léttum nótum í anda upprisu, gleði og vonar. Sr. Þorgeir Arason og Sándor Kerekes við hljóðfærið leiða stundina.

Sunnudaginn 14. apríl verður Góða-hirðis messa í Egilsstaðakirkju kl. 20. Við íhugum og syngjum um hirðishlutverk Jesú um leið og við njótum birtu páskatímans. Sr. Kristín, Sándor, kirkjukórinn og Nunna Maja þjóna. Innilega velkomin!

Sunnudagaskólinn er á sínum stað kl. 10.30 í safnaðarheimilinu. Allir krakkar og vinir þeirra velkomin.