Nýr útiljósabúnaður við Egilsstaðakirkju var tekinn í notkun að lokinni tónlistarmessu í kirkjunni á sunnudagskvöldið, 10. mars kl. 20:00. Þetta var um leið fyrsti liðurinn í að fagna 50 ára afmæli kirkjunnar í ár.

Fyrir rúmu ári síðan tók sóknarnefnd Egilsstaðakirkju ákvörðun um kaup og uppsetningu nýrrar útilýsingar við kirkjuna, sem er jú eitt helsta tákn Egilsstaðabæjar og sést víða að. Slíkt var löngu tímabært en mörg undanfarin ár hefur kirkjan verið lýst upp í skammdeginu með litlum kösturum sem upphaflega voru aðeins settir upp til bráðabirgða. 

Nýi ljósabúnaðurinn kemur frá fyrirtækinu Ligman og samanstendur af 24 kösturum á fjórum staurum hringinn í kringum kirkjuna, auk sérstakra kastara fyrir turninn. Birtan af kösturunum er hlý og falleg auk þess sem búnaðurinn býður upp á ýmsa litamöguleika. Starfsmenn Tréiðjunnar Einis hf í Fellabæ undir forystu Sigurðar Sigurjónssonar og Guðmundar Halldórssonar rafvirkja önnuðust uppsetningu og tengingu búnaðarins, en það reyndist krefjandi og tímafrekt verkefni á klöppinni á Gálgaási.. Formaður sóknarnefndar Egilsstaðakirkju er Eydís Bjarnadóttir og lýsir hún ánægju sinni með hvernig til hafi tekist. „Ljósaverkefnið er hluti af þeim framkvæmdum sem verið hafa við kirkjuna undanfarið ár og hafa aðeins verið mögulegar vegna þeirrar fjármögnunar sem Egilsstaðasókn hefur notið frá Jöfnunarsjóði sókna,″ segir Eydís.

Egilsstaðakirkja var vígð 16. júní árið 1974 og fagnar því 50 ára afmæli sínu á þessu ári. Ljósahátíðin á sunnudag er fyrsti liðurinn í afmælisárinu, en ýmsir viðburðir eru fyrirhugaðir á árinu af þessu tilefni. Hátíðarmessa með biskupi Íslands verður á vígsluafmælisdaginn, 16. júní nk. og sýning á handverki tengdu trú og kirkju verður sett upp í Sláturhúsinu í sumar. Afmælishátíð barnanna og afmælistónleikar eru svo á döfinni í haust.

Messan sl. sunnudag var fjölsótt, en þar fluttu söngnemendur úr tónlistarskólunum á Egilsstöðum og Fellabæ kafla úr verkinu Stabat mater eftir Pergolesi ásamt annarri tónlist. Kór Egilsstaðakirkju söng einnig undir stjórn Sándors Kerekes organista, sem einnig lék á sembal. Virág Kerekesne Meszöly lék á selló og Mairi Louisa McCabe á fiðlu.  Sóknarprestur predikaði og þjónaði fyrir altari. 

Sveinn Jónsson verkfræðingur hefur allt frá upphafi haft umsjón með verkefninu fyrir hönd sóknarnefndar og kynnti hann nýju ljósin við lok messunnar, en kirkjukórinn söng lagið “Ég horfi eftir lífsins ljósi” eftir heimamanninn Hrein Halldórsson. Söfnuðurinn fór svo út á bílaplan kirkjunnar og söng við gítarleik organistans “Amen – Innst í mínu hjarta skal ljósið lýsa bjart” meðan Sveinn tendraði ljósin ásamt Jónasi Þór Jóhannssyni, meðhjálpara og fyrrverandi sóknarnefndarformanni. Almenn ánægja var með lýsinguna og ýmsa litamöguleika hennar, sem safnaðarfólk fékk að virða fyrir sér.

Sr. Cecil Kristinn Haraldsson, fyrrverandi sóknarprestur Seyðisfjarðarprestakalls, lést þann 4. mars síðast liðinn, 81 árs að aldri. Útför hans verður gerð frá Seyðisfjarðarkirkju í dag, 14. mars, og hefst athöfnin kl. 14:00. Streymi frá útförinni má nálgast hér.

Cecil fæddist í Stykkishólmi þann 2. maí árið 1943. Foreldrar hans voru Haraldur Ísleifsson og Kristín Cecilsdóttir. Cecil tók stúdentspróf frá Menntaskólanum á Akureyri árið 1962 og theol. kand frá Lundarháskóla árið 1980. Hann tók framhaldsnám í guðfræði og heimspeki við sama háskóla 1980-1983 og tók fil. kand. árið 1983. Hann tók lestrarpróf frá guðfræðideild Háskóla Íslands árið 1986.

Cecil starfaði sem kennari við Barnaskólann á Ísafirði 1963-64 og við Miðskólann í Stykkishólmi 1964-1970. Hann var skólastjóri Barna- og unglingaskólans á Laugum í Dalasýslu 1970-1971. Hann var kennari við Víghólaskóla í Kópavogi 1971-1973 og skólastjóri Gagnfræðaskólans í Neskaupsstað 1973-1974 og varð síðan kennari við Garðaskóla í Garðabæ 1974-1976.

Cecil var vígður þann 22. janúar árið 1984 í Dómkirkjunni í Lundi í Svíþjóð og varð prestur í Burlöv í Suður Svíþjóð 1984-1986. Hann varð forstöðumaður öldrunarþjónustu á Akureyri árin 1986-1988 og prestur Fríkirkjusafnaðarins í Reykjavík frá ágúst 1988 til 1997. Sr. Cecil var settur sóknarprestur í Seyðisfjarðarprestakalli frá 1. júlí 1998 og skipaður frá 1. september 1999 þar sem hann starfaði til starfsloka.

Fyrri kona sr. Cecils var Ólína Salome Torfadóttir. Börn þeirra eru Kristín Haralda og Haraldur Ísleifur.

Eftirlifandi eiginkona sr. Cecils er Kristín Guðveig Sigurðardóttir. Þau eiga eina dóttur, Þorbjörgu Ölmu.

Stjúpdóttir sr. Cecils og dóttir Kristínar er Guðlaug Vala Smáradóttir.

Helgihald sunnudaginn 10. mars:

Egilsstaðakirkja:

Sunnudagaskólinn að vanda kl. 10:30 í Safnaðarheimilinu.

Tónlistarmessa – Ljósahátíð kl. 20:00 í kirkjunni. Söngnemar Hlínar Pétursdóttur Behrens koma fram. Kór Egilsstaðakirkju syngur og leiðir almennan söng. Organisti Sándor Kerekes. Prestur Þorgeir Arason. Meðhjálpari Jónas Þór Jóhannsson.

Við messulok verður nýr útiljósabúnaður við kirkjuna tekinn í notkun.

Seyðisfjarðarkirkja:

Messa kl. 11:00. Kór Seyðisfjarðarkirkju syngur og leiðir almennan söng undir stjórn Hlínar Pétursdóttur Behrens organista. Prestur Sigríður Rún Tryggvadóttir. Meðhjálpari Jóhann Grétar Einarsson.

Yfirskrift þessa sunnudags, sem er 4. sunnudagur í föstu, er BRAUÐ LÍFSINS.

Verum velkomin til kirkju á sunnudag!

Velkomin í kvöldmessu kl. 18 þann 3. mars í Kirkjuselinu Fellabæ. Við höldum áfram að fylgja Jesú á leið hans til Jerúsalem og atburða dymbilvikunnar og íhugum það í tali og tónum.

Félagar úr kór Áskirkju leiða söng undir stjórn Drífu Sigurðardóttur. Sr. Kristín Þórunn, fermingarbörnin og Bergsteinn meðhjálpari þjóna.

Innilega velkomin!

(Myndin er frá Gerardo Oberman í Argentínu og speglar guðspjall dagsins um Jesú í musterinu, Jóh 2.13-22)

Fyrsta föstudag í mars hefur skapast sú hefð að ólíkar kirkjudeildir um allan heim sameinast á bænastund. Í ár er yfirskrift Bænadagsins „…..umberið og elskið hvert annað“ (Efesusbréfið 4.2) og hefur efni stundarinnar verið útbúið af kristnum konum í Landinu helga og Palestínu. Því verður miðjarðarhafsblær yfir Kirkjuselinu þann 1. mars.

Aðstæður í Landinu helga eru um þessar mundir ósegjanlega erfiðar í þeim stríðsátökum sem þar ríkja og bitna á þeim sem síst skildi. Hugur okkar og hjarta er með þeim sem líða og það viljum við undirstrika í þessari helgistund. Við fáum t.d. að heyra sögur kvenna sem lýsa aðstæðunum sem þær lifa við daglega.

Að lokinni helgistund verður boðið upp á léttar veitingar eins og þær finnast í eldhúsum við botn Miðjarðarhafs. Öllum er velkomið að leggja eitthvað á borðið.

Innilega velkomin öll í Kirkjuselið 1. mars kl. 12!

Sunnudaginn 25. febrúar er konudagsmessa í Egilsstaðakirkju og hefst hún kl. 20. Þar gleðja Héraðsdætur undir stjórn Drífu Sigurðardóttur okkur með söng, við undirleik Sándors Kerekes. Jóney Jónsdóttir kennslustjóri í Menntaskólanum Egilsstöðum flytur hugvekju og sr. Kristín Þórunn Tómasdóttir þjónar. Íris Randversdóttir er meðhjálpari.

Innilega velkomin!

Biblíuleshópur hefst á Egilsstöðum miðvikudaginn 14. febrúar (öskudag) og mun hittast vikulega fram yfir páska. Við ætlum að hittast í þessari lotu á föstunni og í páskavikunni, á miðvikudögum kl. 17:00-18:15 í Safnaðarheimili Egilsstaðakirkju. Sjá nánar dagskrá lestranna hér að neðan. Þemað verður að þessu sinni „Símon Pétur og Jesús“ þar sem við mætum Jesú með augum Péturs, með áherslu á að horfa til píslargöngu Krists og upprisunnar. Við speglum Pétur í okkar eigin lífi, mistökum, efasemdum, sigrum og gleði. Þannig getum við notað föstuna sem andlegan undirbúningstíma fyrir íhugun dymbilviku og fögnuð páskanna. Við lesum saman og ræðum um textann út frá tiltekinni aðferð og efni en stefnum á að brjóta stundina upp með því að horfa á brot úr þáttunum „The Chosen“. Þátttaka er að kostnaðarlausu og hægt að koma eitt skipti, nokkur eða öll eftir því sem hentar. Ekki þarf að skrá þátttöku – nóg að mæta.

Biblíuleshópur Egilsstöðum, lestrar á föstunni og í páskavikunni 2024

Samverur miðvikudaga kl. 17:00-18:15 í Safnaðarheimili Egilsstaðakirkju

Þema: Símon Pétur og Jesús

Sunnudagskvöldið 11. febrúar kl. 20:00 verður gospelmessa í Egilsstaðakirkju. Kór Egilsstaðakirkju mun leiða okkur í lofgjörð og léttri gospelsveiflu undir stjórn Sándors Kerekes sem að þessu sinni verður við flygilinn. Prestur er sr. Sigríður Rún Tryggvadóttir. Meðhjálpari er Guðrún María Þórðardóttir.

Og við minnum einnig á sunnudagaskólann alla sunnudaga í safnaðarheimili Egilsstaðakirkju kl. 10:30

Verið velkomin!

Í kvöld, þriðjudaginn 6. febrúar, verður risa viðburður í Egilsstaðakirkju, þegar öll fermingarbörn á Héraði koma saman ásamt foreldrum á fræðslukvöldi.

Á dagskrá er að hrista okkur saman í því fermingarverkefninu sem núna stendur sem hæst og stefnir á sjálfa ferminguna í vor og sumar.

Við förum í leiki, syngjum bestu sálmana, rifjum upp það helsta sem hefur verið á dagskrá í vetur og fræðumst um ferminguna og hvernig hún tengist skírninni og messunni!

Á þessari kvöldstund skapast einstakt tækifæri fyrir fjölskylduna að kynnast því sem fermingarkrakkarnir þeirra eru að fást við og til að njóta samveru í gefandi umhverfi.

Allir prestarnir plús Bella og Sándor verða með – og þau hlakka öll til!